Thursday 1 November 2012

Subculture

Gothic sub culture a awm a, emo a awm a, punk leh chi hrang hrang a tam mai. Hengte hi mi tam tak chuan sirah hnâwlin, hriatthiamna chhe tê pawh nei hauh lo vin, pawnpui chhe rah hrual taka rah hrep mai an châk thin. Khing sub culture te khian incheina hrang a keng a, tawngkam hran a chher a, a hrethiam lotu tan chuan hriatthiam a har ve ngaih ngaih ngei reng ang chu. Siapsuap leh puanchei ringawt hi mi thenkhatin Mizo culture emaw an tih laiin incheina danglam leh maksak tak tak a rawn chhuak thar a. Thalaite suakbâk vanga thil thlengah ngaiin khawhring sawiin an sawi luai luai a; mahse indem theih a ni ngawt lo, kan khawvel hian a rawn her chhuahpui a ni.

Hnam tin, chi tin hian culture hran kan nei a, amaherawhchu tunlai thiamna leh hmasawnna hian heng culture lian chhungah hian culure tenau a rawn siam a. He culture tenau hi culture ziding ai mahin a huam a zau zawk fo thung! Ram khat leh hnam khat bil maiah a inkhurkhung lo va, hnam hrang hrang, ram hrang hrang a zar zawm thin.

Culture tih hrim hrim pawh hi sawi dan chi hrang hrang a tam hle a. Sawifiah dan tlawnglawnah chuan society pumpui nun dan emaw, khawsak dan emaw, mimal tinte nundan khaikhawm a ni a. Society culture hre tur chuan society-a mitena member an insiam/indin dan te, eng thil nge an ngainata an lawm tih te, eng ang tawnhriat nge an lo neih tawh tih te, inlaichin engtin nge an siam a, engtin nge an inlaichin tih te leh literature, art leh rimawi hmangtein engtin nge thil awmzia an neihtir thin tih te hriat a ngai thin.

Subculture kan tih chu...

Society reng reng hian mainstream culture a nei thin a, chumi hnuaiah chuan culture pêng lehchhawng leh tesep eng emaw zat a nei thin. Mainstream culture kan tih chuan society pum huapina an ngaihhlut leh an pawm, leh an hriat tlanglawn te hi a huap a, subculture erawh chuan chin dan hran leh mainstream culture-ina a pawmpui theih ve chiah loh hranna bîk riau an nei thung. Subculture tam ber, a vai chuan a ni hauh lo vang a, hi khawpui thailaite atanga irhchhuak a ni ber.

Sociology, anthropology leh cultural zirna huang chhungah chuan Subculture tih mai hian kawh bik a nei a, chu chu mi, culture nei, mah se an awmna, an chênna culture lian zawk laka hranna nei si sawina a ni ber. Subculture pakhat khan a awmna culture, a behchhan culture kha a do va, a kalh zawnga a awm chuan Counterculture tiin an sawi thin.

Tute din/siam nge?

Walter Miller chuan subculture rawn chhuahna hi a tlangpui thu chuan nun dan hniam leh thing zawk atanga rawn zichhuak niin a sawi a. David Matza thung chuan Miller-a tanna hi a dik ber lo nia sawiin tunlaia subculture tam zawk hi chu thalaite atanga rawn insiam a ni ber a. Heng thalaite hi khawtlangin an nun danah pangngai taka nung turin a beisei laiin anmahni erawh chuan nun duh dan danglam an nei a. Khawtlang duh dan anga an nun lohvin anmahniah thil tisual nia inhriatna a siam thin avangin khawtlang duh dan bawhpelh chuang si lovin nun dan kawng an dap a, chutiang kawngah chuan subculture hi a rawn chhuak ta thin niin a ngai thung.

Subculture siamtu pawimawh tak te chu tawng hi a ni a, hei bakah hian ngainat zawng te, sakhuana te, politcs thil te, sex leh chênna hmun azir te leh thil dang tam tak a awm thei a. Subculture chhûnga mite chuan inchei danah te, nun danah te leh tawngkamah tihdan bîk riau an nei thin a, chên duhna leh awm duhna bîk an nei bawk. Entir nan, club pakhatah emaw an awmkhawm bîk a, a nih loh chuan kawtthler emaw, vêng pakhata chêngho an ni thin.

Heng subculture hringtu lian ber chu tunlaiah chuan music hi a ni awm e. Gothic, emo, punk leh chi hrang hrang a awm a. Gothic culture bîk hi 1980 chho vela United Kingdom atanga rawn chhuak nia hriat a ni a, a rawn lan chhuahna hi Gothic Rock atangin a ni. Gothic Rock pawh hi Punk atanga peng hrang a ni a, 1970 leh '80 inkar vel kha chuan punk rock pêng pakhat anga ngaih a ni thin. Gothic fashion hi Mizote hian ka la hmelhriat lutuk lem lo va, a music erawh kan hmelhriat hle tawh a ni. Emo pawh hi music nena inkaihhnawih tho a ni a, hardcore punk atanga pêng a ni. 1990 vel atang khan indie music sawi nana hman a ni tan a. Mizote chuan a music lam ai mahin incheina lamah kan hmelhriat zawk thung.

Engtin nge kan hriat ang?

Subculture hi a behna culture pangngai atangin hriat hran theih dan kawng ruk awmin an sawi a. Ken Gelder chuan chung kawng ruk te chu sawifiahin heng Subculture kan tih maite ho hi hnathawh chungchang an en dan atangin a hriat theih niin a sawi. Hnathawh aiin awm âwl leh intihhlim lam nen an inkungkaih zawk a, class emaw, inthliarna lam a langsar vak lo va, awmkhawmna/chênkhawmna bik an nei bawk (club, street etc.). In chhûng pâwnlama an chet thin dan atangin a hriat a, chhungkua ai mahin pawnlama nunhona an ngai pawimawh mah zawk a, tihdan bik riau an nei a, mahni nih loh anga nun leh khawsak an duh lo bawk.

Dick Hebdige chuan a lehkhabu 'Subculture the Meaning of Style' ah chuan subculture chu pangngaina tiderthawngtu niin a sawi a. A ni reng lah tak a, subculture hian a tam zawk tihdan leh nun dan phung a do a, a kalh tlat rêng a ni. A nihna takah chuan subculture chuan mi thenkhat, khawtlang nun dan phung pangngaia leng ve lo nia inngai te a tuam khawm a, nihna thar a siamsak a ni ber.

Subculture hrang hrangte hian inchei dan bik leh tihdan bik an nei a, nun dan bik an nei a ni. Hengte hian a hunlaia mite ngainat zawng leh uar zawng an tilang a, an ai an awh a ni ber ang chu. An tihdan leh inchei dan te mipuiin an copy a, heng subculture chhûnga tel ve hauh lo paw'n an tihdan chu tihdan tur emaw an ti a, changkanna emaw an ti bawk thin.

Tunlaia fashion changkang leh lar nia kan hriat tam tak hi tunlai fashion a ni ber hran lo va, incheina changkang leh tha ber a ni hek lo; fashion tharlâm nia kan hriat tam tak hi culture hlawmpui zinga a tepêng pakhatin an chîn thin a ni mai a. Subculture pakhatina an uar bika kha kan tawmpui tihna mai a ni.

Culture hlawmpuiina model a lo siam sa zâwm peih lo leh tlêma uchuak duhna ten subculture hi a siam a ni a. Nun dan pangngai khama nun dan danglam deuh duhna rilruina a hrin chhuah a ni ber a, hei hi Kristian thalaite tâna zawm ve chi a ni ber lo va. Mahni inngaihpawimawhna leh mahni ngainat zawng leh duhzawng anga nung thei tura beihnain heng subculture tam zawk hi a tuam a, midang engah vak mah ngaihlohna leh mahni hmasialna a lian ber; Lal Isua zirtirna nen chuan a inang lo khawp mai. Suahsualna leh pawikhawihna hrang hrang pawh subculture chhûngah hian a hluar duh viau zel a, chuvang chuan Kristian thalaite heti lam kawngah hian kan fimkhur hle a ngai a ni.