Kha nula kha

Khua a duai hle mai a, hmun thren threnah chuan ruah mal pawh lian vak lovin a tla siap siap reng a. Khua nuam lovin, kawngte chu kawi niai mah se pisa kai hun a nih avangin kawngpui erawh a tawt hle a, traffic police tan pawh buaina tham thil lian tak tak a awm deuh reng a. Kawng dung chu tlangdung bawh zawnga kal a nih loh avang leh, tlang vet chhuak zawng pawh ni lo, a lawn zawnga a kal avangin a chho tih loh rual a ni lo.

Motor vei vak a tam a, two-wheelers pawh a karah tam tawk tak an vei tuak reng a. Chutianga mi hrang hrang leh motor hrang hrang insulpel kara Scooty sendanga chuang chu theihnghilh hleih theih tawh loh tura danglamna nei a ni tlat thung. A hmel thrat leh chhiat thu chu a hmutu mit azir a ni thei a, a pian leh fuke nalh leh nalh loh erawh a awmna hmunin a zir loh avang leh, pheikhawk leh kutkawr a bun avangin hriat tam theih a ni lo thung. Mahse, a hmelah chuan tumruhna nasa tak a awm thung!

Chutih hunlai boruak thlir chuan a hmela tumruhna chu zirthiamna lama tumruhna a ni lovin alang a, rualelna lamhawi lah a ni hek lo. Sailo lalna tundin leh tumna hmel a ni lo va, MNF sorkartir leh ngei tumna pawh a ni hek lo. En thuak chuan Independent Movement kaihthawh tum a ni lo tih a hriat a, en chet chet paw’n Chiahpuama a pawisa bo hmuh let leh ngei a tumna a ni lo; a hmela tumruhna chu, chu kawngchho leh chep, motor tam tak kara tlu lo leh mi tai palh miah lova kaltluan tumna a ni.

Sailo lal fanu tlum ber anga no nalh leh hmelthra ni chuan a hriat loh a, amaherawhchu a hmela tumruhna nasa tak avang chuan tran loh theih a ni lo. Bawhzui tlak a nih leh nih loh ka ngaihtuah hman lo va, a hmela tumruhna chuan ka rilru a luah ta reng zawk a, a tawpah chuan heti hian ka ngaihtuah, “Kea kal aiin scooty a khalh khan a hah zawk daih ang,” tiin.