Monday, 20 March 2017

Laih-Puam

Bul tanna
Kum 1847, thâl khaw ro vanglai tak a ni a, California phei chu a lum lehzual hle; taima vak lo tan phei chuan chhuanlam a tha a, daihlim hnuaia tawmbo mai pawh a remchang hle. Putar John Sutter erawh chu a intunnunna tur ngaihtuaha a chhuah a ngai a, ni a sat leh sat loh ngaihtuah a hun lo.

Putar, khabe hmul pawr ve tak, a thawmhnaw inbel atang rêng chuan thuhriltu emaw, sumdawng emaw a ni lo tih hriat ngawih ngawih John Sutter chu khawvelin 'mi ropui' tia a chhiar zingah engtikah mah a lang pha dawn lo va, pa taimate zingah pawh a lang pha chuang lo. W. Marshall-a thawhpui pakhat ve mai a ni a, buhrawtsawmna hmun an din chu a hming chherna a ni ve mai, a bak thil dangah a ropui em em lo.

Chumi tûk kher kher chu ni pawh a sa tha lehzual hle a, ni êng chuan a no nalhna zawng zawng dah thain a rorumna leh a tawrhhlelhawmna a chhuah ni maiin alang a. Putter John Sutter pawh tûk dang ang bawkin hnathawkin a chhuak leh ta a. A hmaa lui kawr a lo kal fo tawhna thinah a tuithawl thun khah pahin a'n chawl zawk a, chumi pah chuan lui chhuata thil tle vât vât chuan a mit a la tlat. Luia a thil hmuh en chiangin a luh chilh a, chu thil tle var var chu eng dang ni lovin rangkachak tlang a ni tlat! A mit a nuai a, mahse rangkachak ngei a ni; a mitvai ni lovin. A hnathawh tur pawh ngaihtuahin lovin khuaah a tlânpui thuai a, midang a entir a, rangkachak ngei a ni tih an nemnghehpui a ni.

Chu thu chuan reiloteah America khawthlang lam a fan chhuak a, khawchhak lamah a chho zel a, khawvelin tun thlenga a hriat, 'California Gold Rush' chu a intan a ni ta dêr mai, Sâp Laih-Puam chu!

Laih-puam
California-a rangkachak hmuh chhuah thu chuan ram kâng ang maiin a vêl a fan chhuak a, hmun tin hmun tang atangin California Laih-Puam chu hlawkpui ngei tumin a khau kâpin mi an rawn pung khawm a. Khawchhak tawp New York atang te, Alabama leh Latin America lam atangtein mipui an rawn chhuak mur mur mai a. Laih-Puama hlawk ve ngei tum chuti zat zingah chuan vannei tâwk an awm a, vanduai ta pawh tam tak an awm.

Hausak thut duhna mihring thinlunga awm rawn puak chhuak chu a nasa kher mai. Prairies phaizawla Commanche, Sioux, Cherokee leh Red Indian dangtena an phil tur pawh pawisa lo leh, ruk hmang leh suamhmang rual kuta tualthi mai thei an nih pawh ngaihtuah chang lo lêkin, hausak thut duh avangin Laih-puam hlawkpui ngei tumin mipui an rawn pungkhawm a. Misual tawn chu sawi loh, ramsa tihbaiawm tak tak kuta ram daia ring rawlh mai thei an nihna zawng zawng theihnghilhin, sum leh paia hlawk tumna chuan hmun hrang hrang atangin a ûm chhuak a.

Hausak thut tum tam tak chuan an tum hmun, California an thleng pha lo kher mai. Mississippi lui pawh kân hman ta lo mi tam tak an awm a, a kân theite pawh Rocky Mountain-ah te an tlu hlum a. California thleng thla thei eng emaw zat zingah laih-puam lai ve ngei, mahse kut bênga awm, tiau vut leh lung nawi mai lo chu lai chhuak ta lo tam tak an awm bawk. Hlawhtling tlêm tê zinga thenkhat chu, an thawhchhuah ve chhun suamhmangten an chhuhsak bawk. Hausak thut châka mi tam tak tuihalna chu tihreh a ni chuang lo; inthahna, insuamna leh tharum thawhnate chu a chanchin ken belh a ni lek ta fang zawk. Chu chu a ni, Dan Fogelberg-an 'And some would curse John Sutter's Mill, Some men's thirsts are never filled' a lo tih ni.

Duhâmna chimawm
Hausak thu duhna leh, hahdam zawka sum hmuh duhna hian mihring hi a lo va ti â nasa thei tak êm! Spanish Conquistador ten El Dorado zawngin South America dung leh vâng an fang a, eng ruai an hmu chhuak lo. An kal kawnga an thil tihchhiat, American Civilization ropui tak te avangin khawvelin a dem a ni. Fountain of Youth inzawnsiakna khawvel chuan Caribbean thliarkara lo cheng hmasate he khawvel ata a nuai bo bawk!

Mizote pawh hi hnam fing zawkte beidawn tawh hnuah hausak thut châknain min man ve leh hnuhnawh a! Chiahpuam avanga kan buainain reh lam a pan mêk laiin awke banga awm mai mai kan thlêk kan thlêk a, gram eng zat nge a tlin tawh ang, tih ringawt kan ngaihtuah a. Awke-in kan tuihalna a fah zo ta chiah lova khehpuam lamah kan lût leh ta. Hausak châka tuihal mihring rilru rapthlakzia hi kan ngaihtuah ngai em?

Environmental Issue hi a bul thut atangin chhui dawn ila, kan mawhpuh ber tur chu khawthlang ramho duhâmna a ni ang. A leh pek tur pawh ngaihtuah miah lo va, pawisa tam tak an hmuhna tur ringawt ngaihtuaha thil siam chhuak a, thing leh mau leh, nungcha chena an tuar nasatzia hi! Chutah hnam mawl zawkte nun dan, nature nena inzawm tha em em, an mamawh an hmuh duh tâwk mai a, hausak tum lova mitina kan mamawh kan hmuh theihna tur an ngaihtuahna khawvel chu 'uncivilize' min tihsak mai a. Red Indian hovin 'Ghost Dance' an tih hnua ram lawi (bison) an rawn kir mai thin a, chuta tanga an ei khawp tâwk an lo kah ve ang chu hnam mawl zia niin an ngai a, a vun hralh atana an duh avangin an veh rêm lek lek a nih kha.

Mihring duhâmna hi chin tâwk nei lêk lova kan chhuah zalen chuan kan leilung hian a tuar a, kan mihringpuiten an tuar a, mahni ngei pawhin kan chhiatpui thin. Khawvelin hausakna a ken, a rah hi mi zawng zawng mamawh phuhru tâwk a ni a, mahse hausakpui tum chuan he khawvel hausakna hian a daih ngai lo ang. Mahni chan tur tâwk aia tam chan kan tum theuh avangin hmasawnna tur sum pawhin a thlenna tur hmun a thleng thei lo thin a nih hi. Chiahpuam a ni emaw, khehpuam a ni emaw, laih-puam pawh chu lo ni ta tehreng se, mihring min phuarkhawmtu zawk chu kan mamawh inphuhruk tawnna hi a ni a. Duhâmna hian mihring min thendarh a, huatna leh innghirnghona a thlen thin.

Thursday, 16 March 2017

In sim loh chuan in boral ang

'Nangni pawh in sim loh chuan chutiang bawkin in boral vek ang'

Luka 13:1-5 thuah hian hetih hunlaia Palestina rama chhiatna lian ber ber kan hmu a, heng chhiatna leh thihna te hi politics leh sakhua nena inkungkaihna nei an ni. Pilata hian a hmain Jerusalem-ah Rom chhinchhiahna mupui lem a lalut a, nasa takin an dodal a, Kaisari khuaah a la thla leh a. Hemi hnu hian Jerusalem-ah tui lakna a siam a, hei hi Luka bua chhiatna kan hmuh thlenna chhan niin alang.

Jerusalem hi tlang chunga awm a ni a, tui a harsa hle a, hei vang hian Pilata chuan tuilakna (aqueduct) chu a siam a. Tuilakna siam nan hian sorkar sum a tam tawk lo va, Temple sum a hmang a, hei hi Juda mipuite chuan sum thianghlima an ngaih a nih avangin an duh lo hle a ni. Juda mipui tam tak chu temple sum hman a nih avanga duh lovin an pungkhawm a, an zingah hian Pilata'n civil inthuama inthuam sipai eng emaw zat, ralthuam puanhnuai chungin a dah a, heng civil inthuama inthuam sipaite hian civil mi tam tak an that a ni.

Siloam in sang chim pawh hi tuilâkna siam nena inkungkaih bawk niin alang. Siloam hi Jerusalem khaw tui tlan pawimawh tak mai a ni a, Jerusalem chhim thlang lama awm a ni. Heta luanglut tura tuilâkna (aqueduct) hi siam a ni nge, Siloam atanga khawpui chhunga tui luanluhna tura an siam zawk hriat a harsa deuh.

Heng chhiatna lian tham pahnih, mi tam tak thihna chungchang hi khatih hunlaia Jerusalem mai ni lo, Judai rama titi ber a ni a, he chhiatna hian Judate rilrua zawhna awm sa a rawn chawk tho va. Judate hian thihna, piansualna leh hrehawmna te hi sual vanga thleng niin an ngai thin (Joba bu hian chhiatna zawng zawng hi sualna avanga awm a ni lo tih zirtir a tum). Isua chuan vanduaina tawktute hi an sual vang emaw, an nu leh pate bawhchhiat vang emaw a ni lo, tih a zirtir a. Chhiatna leh vanduaina hi mihring chungah engtik lai pawhin a thleng thei a, chuvang chuan sual sim a, inring renga awm a pawimawh a ni, tiin a zirtir a ni.

Sual avanga tuar chu an awm na meuh mai, amaherawhchu chhiatna leh vanduaina kan tawrh zawng zawng hi sual vang a ni kher lo. Engtik hunah pawh kan chungah hian vanduaina leh chhiatna a thleng thei reng a, a pawimawh ber chu heng harsatnate pawh hi lo thleng mah se, kan inpeih a ngai zawk a ni.

Tunhnaiah Mizoramah chhiatna a thleng tam ta hle mai a, kar tin mai hian ruang chhar leh accident thâwm hriat tur a awm reng. Hetiang chhiatna hi a lo thleng thei reng a, kan chungah ngei pawh hian engtikah nge a lo thlen dawn kan hre lo; chuvang chuan sual kan sim a, Lal Isua tâwk tura kan inpeih a ngai a ni.

Pilata'n Galili mi a tihhlumte chungchang thu Isua an lo hrilh varna chhan hi Isua dan kawl-âwk an tum vang niin alang. Pilata duhzâwnga thu a sawi chuan, Rom lamtangah an puh ang a, phatsantu, an ti dawn si a. Judate lamtang anga a sawi chuan Juda hruaituten Rom dovah puhin, manna hun remchang leh sawichhiatna hun remchang an hmu dawn a ni. Hei hi Isua pawhin a hre reng a, chuvang chuan Pilata thiam lohna lama luhpui lovin, sim a pawimawhzia a sawipui niin a ngaih theih.

Siloam in sang chim chanchin a sawi kai ta a. Siloam in sang chimin mi 18 a delhhlumah hian a thi tate khan mawh an phur lo va, Pilata'n mawh a phur hek lo. Chhiatna leh vanduaina hi mihring chungah engtik hunah pawh a thleng thei reng a, chuvang chuan sual sima inring renga awm a tul a ni. Siloam in sang chimin a delhte khan sualna an nei tho ang, chutiang bawkin, mihring piang chhuak zawng zawng chuan sual kan nei vek a, kan sual kan sim loh chuan chatuana boralna kan chang dawn a ni tiin Isua chuan a lo hrilh ta zawk.

Motor accident engtikah nge kan tawh dawn a, damlohna avangin engtikah nge kan thih ve dawn? Sual sima Isua hnen panin, inring rengin kan awm a pawimawh a ni. Zualko thuin engtikah nge min den ve dawn a, keimahni ngei hi engtikah nge a tuartuah kan tan dawn kan hre lo va, chuvang chuan sim a tul a ni.

Thi thei kan ni tih kan inhria a, mahse tar thlenga dam tur angah kan inngai tlat thin. Mi an thi a, keini erawh chu la thi ve mai lo turin kan inngai a ni. Naktuka thi mai thei kan ni tih kan ngaihtuah ngai lo va, zaninah emaw, nakkin lawkah emaw kan thi thei a ni tih kan suangtuah ngai lo. Muang takin kan awm a, nun thlahdah takin kan nung a, mahse thangâwk angin thihna hian min la rawn nang thut dawn. Chutiang hun a lo thlenah chuan engtin nge kan awm ang? Thil tha ber dawng tura kan rilru kan buatsaih a, vanneihna leh hlawhtlinnate hmachhawn mai tura kan inngaih ang hian thil chhe ber leh vanduaina rapthlak ber hmachhawn mai thei tura inpeih kan ngai a ni.

Kan khawvel hi kan chhût chuan chhiatna leh manganna tam sâwtzia kan hria ang. Nitin chanchinbuah chhiatna lam hawi deuh hlir kan hmu a, TV-a chanchinthar puanah pawh hetiang thu hian hmun a luah hnem ber. Lir a nghing a, hnam leh hnam, ram leh ram indo turin an inep mup mai a. India leh China te an inepna ringawt pawh hian khawvel ralmuanna a tiderthawng a, nuclear bomb nei ram ve ve an nih avangin heng ram pahnihte inep thâwm hian boruak a siam hle a ni. Heng zawng zawng hi nau vei tantirhna pawh a la ni pha lovin alang.

Chhiatna te, chêtsualna leh indona thu kan hriat avangte hian lungngai a, phili mai tur kan ni lo va, kan inrin a, sual kan sim a pawimawh zawk a ni. Paula chuan zân hi a ral lek lek tawh a, khua a var dawn ta, tiin, thim thuamte paihthla turin min hrilh a, chuvang chuan, simna hun kan la neih a, khawfing a chah hma hian kan sim a, kan inrin a tul a ni (Rom 13:12).

Isuan rawng a bawl dawn khan Baptistu Johana chuan sim rawh u, tia auvin, vanram a hnaih tawh thu a puang a (Mat 3:1-2), hetiang bawk hi kan hun tawn chhoh mek hi niin alang. Harsatna hrang hrang. chhiatna hrang hrang lo thleng tur hi Isua chuan a lo sawi lawk vek tawh a (Mat. 24:3-28), chuvang chuan mangang lo va, sim a, Isua tâwk tura inpeih a ngai. Heng chhiatna leh vanduaina thu kan hriatte hi Isuan rawng a bawl dawna Johana thuhril ang kha an ni a, Pathian Ram hnaih tawhzia puang chhuaktu an ni. Heb. 10:25-ah chuan ni chu lo hnai telh telha in hriatin infuih tawn nasa lehzual sauh rawh u, a ti a, kan infuih tawn a, rinna chak leh nghet kan neih a, manganna lo thlen hun pawha thlamuang taka kan awm theih nan ringtute chu i infuih tawn ang u. Vanduaina thu kan hriat avangte hian mangang mai lovin, chhiatna leh buaina thâwm kan hriat avanga phili lo turin intichak ila. Hengte hian Pathian Ram a taka a lo lan hun a hnai tawh a ni, tih hre chungin, inthlamuan tawn zawk ang u.

Thursday, 16 June 2016

Tute nge Samari mite?

Presbyterian Kohhran puitling Sunday School chuan kuminah Thlarau Thianghlim tih kan zir a, a ngaihnawm hle. Tun Pathianni lo awm turah hian Thlarau Thianghlim Hnathawh Kal Zel tih kan zir dawn a, hetah hian Samari mite chungchang sawifiahna tlem a awm a, hei hi a dik tawk lo deuh. Kan zirlaibu mai bakah, Bible bu hnung lama Thu Har Hrilhfiahnaah pawh hian a dik lo deuh chu a ni.

Zirlaibuah hian Samari mite chu Babulon sala Juda hruai bâng, hnam dang nena inneih pawlh atang lo piangte niin a sawi a. Mizo Bible, tuna kan hman tlanglawn zawk, Reference Edition-a a tawpa Thu Har Hrilhfiahnaah pawh hian Babulon saltânnaa kal ve lote anga tarlan a ni a, Mizo Bible lehlin thar ber (Common Language version)-ah hian hmar lam mi thlahte nge an nih chhim lam mi tih a chiang lo. Samari mite hi Babulon sala hruai bângte leh hnam dang inneih pawlh thlah atanga rawn chhuak ni loin, Assuria sala hruai bang Israel hnam 10-te (hmar lam lalram) thlahte zawk an ni.

Zirlaibuin a sawi dan chuan BC 586/587-a Babulon-in Judate a rûn a, sala hruai bâng an ni a ti a, mahse a nihnaah chuan BC 722/21-a Assuria-in hmar lam lalram a tihchhiat a, sâla a hruai bângte thlah an ni. International Standard Bible Encyclopedia-ah te, New Bible Dictionary 3rd Edition-ah te Samari mite chu hmar lam lalram, Israel hnam 10-te Assuria-in a hneh a, sal a hruai bângte thlah an ni tih a sawi a, an lo chhuahnaah hian Juda ram lam a lang lo. A ziaktuin a tih dik leh dik loh chu thu hran, a edit-tu lam pawhin an hmu lo a nih hmel. A dik zawk a awm reng lai a, a dik lo zawk anga inzirtir tur nge ni ang, a tihdikna siam emaw, a dik zawk anga inzirtir tur zawk ni ang tih ngaihtuah a ngai khawp mai. A dik lo zawk anga kan inzirtir chuan Mizoram pumah Samari mite lo chhuah dan kan hriat dan a dik lo reng tawh dawn a nih hmel e.

Nikum, kum 2015 thleng khan Samari mite hi mi 777 an la awm a, Gerizim tlanga Kiryat Luz leh Tel Aviv khaw daia Holon te chu an awmna bik deuh a ni. Anmahni inngaihdanah leh inchhal danah pawh Juda hnam thlah emaw, chhim lam lalrama tel thin Benjamin thlah emawah an inchhal ngai lo a, BC 722/721-a Assuria-in Israel lalram a tihchhiata dam chhuak, Ephraim leh Manasia thlah kal zelah an inchhal. Heta tanga mai pawh hian chhim lam, Juda lalram atanga chhuak an ni lo tih a chiang âwm e.

Assuria lal, Sargon II record atanga a landanin, Assuria-in Israel (Samari) ram a rûn khan mi 27,290 zet a hruai chhuak a, Assuria ram chhung hmun dangah a chêntir a, an hmun ruak luah khat turin Assuria sorkar hian Israel ramah hian Babulon leh Kutha ram atangin hnam dang a hruai lut thung a ni. Kutha hi tunah chuan Tell Ibrahim tih a ni tawh a, Iraq ram laili lai, khawchhak lam hnaih hret, Tigris leh Euphrates inkara mi a ni a, Nippur hmarchhak lam hret, km 40 vela hlaa awm a ni. Heng hunlai hian mipui, an awmna hmasa atanga hmun danga hruai chhuaha awmtir hi an ching hle; Babulon-in Jerusalem a lak a, a hruai darh pawh khan Juda mi tam takte chu Mesopotamia rama Tel Abib-ah a dah a nih kha (Eze. 3:15 - tunlai Tel Aviv pawh hi he hmun hming chawia an phuah a ni. Hebrai hawrawpah chuan V leh B hi a inang a, chhut han awm leh awm lohin V emaw B emawa lam tur a ni).

Assuria sorkar hian hetianga mihring leh hnam, hmun danga sawn kual hi a ching hle a, kum 300 chhung zet lalram ropui tak an din chhung hian mi maktaduai 4.5 zet chu an awmna hmun a sawn kualsak a ni. Hetia a tihna chhan hi tam tak a awm. Ram a awp zau zelah sipai a mamawh hnem tial tial a, sipaia a lak hmun ruak hnawhkhat a, ei leh bar thar chhuak turin mihring a mamawh belh a ni. Chu bakah in leh kulh ropui tak tak a sain a siam a, chungah chuan mithiam bik tam tak a mamawh a. Lung khawih thiam te, thing khawih thiam leh themthiam tam tak chu a ram lak atangin a khawm thin. Tin, an ram laka mi, an awp chhunga awm hnam leh khua, an laka hel rilru pute chu an hriat ngai loh ramah hrem nan a sawn kual bawk thin.

Gerizim hi Samari mite tlang thianghlim a ni a, an tempul pawh he hmunah hian a ding thin nghe nghe. Isuan Samari hmeichhe tuichawi a hmuh a, a hnena a sawi, "He tlangah kher lo pawh, Jerusalem khuaah kher lo pawh..." a tih a, 'He tlang' a tih hi Gerizim tlang a ni (Joh. 4:21). Gerizim tlang hi tunlaia West Bank chhunga Nablus khaw bul maia awm a ni a, a hmar lam epah Ebal tlang a awm. Deut 11:29-ah khan Gerizim tlangah hian malsawmna dah turin a hrilh a, Deut 27:11-ah kan hmu leh bawk. Samari mite chuan Abraham-a'n Isaaka hlan a tumna hmun pawh kha Gerizim hi niin an sawi a, Jerusalem-ah ni loin, he tlangah hian tempul sa turin Pathianin a ti niin an sawi bawk.
............................
Lehkhabu rawnte
1. International Standard Bible Encyclopedia
2. New Bible Dictionary (3rd Edition). OM Published
3. Wikipedia 'Samaritans'

Monday, 4 April 2016

Zawlnei Der

Thuthlung Hlui, lalte an lal hma hun atanga Jerusalem tihchhiata a awm dawn hnaih thleng khan zawlnei der kan hmu fo a, Pathian zawlneitena an sawisel thute pawh kan hmu a ni. Zawlnei derte hi a then chu an hmingte pawh tarlan an ni hial. Engtianga zawlnei dera rawn chhuak mai nge tih te, zawlneia an inchhal a, miin an rin ngawt theih dante hi hriat theih a ni chiah tawh lo nachungin, thu ken pawimawh tak an nei ve a, mahse Pathianin a zawlneite hnena thu a dah nen chuan a letling hlauh a ni thin.

I Lalte 22:11-ah chuan zawlnei der Zedekia, Kenaana fapa kan hmu a, Juda lal Jehosaphata leh Israel lal Ahaba te ral do tura an kalin an chak dawn tiin a puang ve ngawt a, mahse Pathian zawlnei Mikaia chuan an chak loh tur thu a puang thung. Jeremia bung 28-ah khan zawlnei der dang, Zedekia tho, Kenaana fapa ni lo kan hmu bawk. Jeremia 29-ah chuan Shemaia kan hmu a, Balaama pawh hi zawlnei der niin alang. Heng bakah hian zawlnei der tam tak an awm a, chung mite chuan an hunlaia roreltute duhzawngin an zawl thu an puang thin. Hebrai Bible-ah chuan zawlnei der tiin a sawi chuang lo a, zawlnei tiin a sawi tho a, mahse Septuagint khan Zawlnei Der tih hi a rawn hmang tan a ni.

Zawlnei derte hi engtia lo awm mai nge tih hriat a har viau. Thil ni thei chu Roreltute hunlai atanga awm tawh zawlnei zirna school chu hun kal zelah, lalten ro an rel hnuah sum leh paiah te an lo duhâm ve ta deuh ang a, roreltute tihlungawi a, an hnen atanga fund (sum leh enkawlna dang) an hmuh that theih nan te, mimala sum thawh chhuah nan ten zawlnei derte hi an rawn chhuak a ni ang (Mika 3:11,12; Jer. 6:13; Eze. 22:23-31). Zawlnei school hi Samuela din Rama khuaah a awm a, Bethel, Gigal, Gibea leh Jerikoah te a awm bawk.

Pathian zawlneite chuan Pathian thudik puan chhuah a, an sualna atanga sim a, Pathian hnena kir leh turin mite an koin an hriattir thin. Rorelna dik a awm theih nan te, mi rethei leh rahbeh tuar te tan an dinsak a, dikna an au chhuahpui a, heng mi hnuaihnungte hian an chanvo an chan theih nan an au chhuak thin. Thuneitute leh roreltuten kawng dik lo an zawhin kawng dik an zawh theih nan an au chhuak thin. Hleih neia rorel an dodal a, Pathian dan an puang chhuak a, dikna leh felna tungding turin an che chhuak thin a ni.

Zawlnei derte thung chuan Zion chu Pathian awmna, a hming chuanna khawpui a nih avangin tihchhiat theih loh, hnam dangtena an hneha an lak theih loh angin an sawi thin a, Davida lalthuthleng tihngheh a nih thu an uar em em bawk. Dâwt thu an puang thin a (Jer. 6:13; 27:14; Zak. 13:3), an mumang hmangin mipuite an bum a (Jer. 29:8), zawlnei tak takte tan an hlauhawm a (Jer. 26:7), Pathianin a pawl miah loh leh a, a awmpui miah loh pawhin zâwl thu an puang mai thin (Jer. 23:18). An zâwl thupuanah chuan muanna leh damna a awm miah loh lai pawhin muanna leh damna an puang a (Jer 6:14 ; 8:11 ; 14:3 ; 23:17 ; 28:2; 28:11 ; Ezek 13:10 ; Mikah 3:5), an thil hmuh miah loh, anmahni thinlungin a ngaihtuah chawp mai maite an puang thin ( Jer 14:14 ; 23:16 ; Ezek 13:2-3 ; 22:28). Zawlnei der thenkhat chuan aiente an ching bawk (Eze 13:17-23).

Khingte khi Thuthlung Hlui chhung, Israelte chhung bika zawlnei der an ni a, milem biakna sakhuaah zawlnei der an tam a, aienthiam, mitthi biak ching leh chi dang tam tak an awm (Deut 18:9-13) a, heng mite pawh hian eng eng emaw chu an puang chhuak ve thin a nih hmel.

Zawlnei hna hi a hautak hle a, a nuam china zawlnei, hmingthat leh fak hlawh a, thuneitute atanga sum hmuh tum emaw, hlawkna hmuh tumte chu zawlnei der an ni. Zawlnei tak takte chu an nunna thâpin Pathian tan an che a, miin an sawi dan tur leh an hmuh dan tur an ngaihtuah lo. Zawlnei Nathana chuan hmaichhanah Davida chu a tihdik loh a hrilh hmiah hmiah mai a, Pathian tan a nih chuan mawihawih a zawng lem lo. Elija chuan Ahaba chu a hmaichhanah a thih dan tur rapthlakzia a hrilh siah siah mai a ni. Jeremia chu Pathianin ti tura a tih angin, amah chu entir nana inhmangin a sam a ziat kawlh a, a chângin nghawngkawl a siam a, a phur chhuak a; kan hunlaia thil thleng ni ta se chuan mi ang lo let dêra kan ngaih loh pawhin, a kalsual tan niah kan ngai ang. Isaia chuan inhmachhawnin lal Hezekia thih tur thu a hrilh hmiah mai bawk.

Thuthlung Tharah kohhrante hi zawlneite lungphum chunga innghat kan nih a, zawlnei hna chhunzawmtu kan nih si chuan sualna leh dik lohna te, inrahbehna te hi mi huaisen kal hmasate ang êm kha chuan kan vei zo lo deuh tawh lo maw? A mawihawih hi kan zawng lutuk ta deuh em? Member chân leh thawhlawm hmuh tlêm kan hlau lutuk ta deuh nge, thuneitute hi an dik lohnaah pawh kan hlau ta deuh? Pathian tan hian mi â tia mi min sawi te hi kan hreh ta deuh a ni em? Changkang leh hmasawn kan tum lutukna lamah hian zawlnei derte nihna hi kan hlat lo zawk ta deuh viau ang em? Biak in tur hmun tha kan neih theih nanten zawlnei hna thawh tur ang zawng zawng hi kan thawk tha ngam ta chiah lo pawh a ni thei e.

Pindan chungnung leh mipa tuichawi thu

Isua hoa Zanriah Hnuhnung an kilna hmun, Pindan Chungnung hi a nei ve ngai lo Mizote tan chuan hriatthiam a har deuh mai thei. A hming hi hre larin, lam zing viau mah ila, mi tam tak tan chuan mithla thiam harsa tak tur a ni.

Pindan Chungnung hi Judate khan an in sakah an telh fo a nih hmel. II lalte 1:2-ah khan lal Ahazia pindan chungnung chu a in chhawng hnihnaah a awm tih kan hre thei a, khata tang khan a tla thla a nih kha. I Chro. 28:11-ah te, II Chro. 3:9-ah te chuan temple-ah pawh pindan chungnung a awm tih a lang bawk. Elija'n Zarephath hmeithai fapa kha pindan chungah a pawm chho tih kan hmu bawk. Thuthlung Hlui hunlai atang tawhin in chhawng sak hi an lo ching tawh a, pindan chungnung hi an lo siam tawh thin a ni. Israelte khan pindan chungnung hi sakhaw thil hmanna, chhung inkhawmah te pawh an hmang thin a nih hmel.

Isua pawh khan pindan chungnung hi a zirtirte nen an hmang fo niin mithiamte chuan an ngai. Zanriah hnuhnung an kilna a ni a, a zirtirte kê a silsakna hmun a ni. Hei bakah hian Isua a thawhleh hnua a zirtirte an lo awm khawmna hmun, an zinga a inlarna hmun kha pindan chungnung nia ngaih a ni a, Isua vana hruai chhoh a nih hnua a zirtirte awm khawmna hmun kha nia ngaih a ni bawk. Tin, tirhkoh atana Matthia an thlanna hmun kha pindan chungnung nia ngaih a ni a, Pentikos Nia Thlarau Thianghlim rawn thlenna hmun, ringtu hmasa 120 te inhmuhkhawmna hmun pawh kha pindan chungnung bawk nia ngaih a ni.

Isuan zanriah hnuhnung a kilna hmun, pindan chungnung hi Cenacle tia hriat a ni a, a hnuah Juda mi ringtute khan sunagogue-ah an hmang nia hriat a ni. Catholic Encyclopedia chuan AD 70-a Titus-a'n Jerusalem a tihchhiat khan he hmun, Pindan Chungnung, Isua'n zanriah hnuhnung a kilna hmun hi tihchhiat loh niin a sawi a, mi thenkhat chuan Rom sipaiten an tichhia a, a hnuah an siam tha leh niin an ngai thung. Hemi hnua, Rom rama Kristianna pawm a nih hnu khan sak that a ni a, AD 614 khan Persian ten an rawn tichhe leh a, a hnu lawkah sak that leh a ni. Muslim-hoin an tichhe leh a, Kristian ram mut tum khan an sa tha ta a ni.

Pindan chungnunga zanriah hnuhnung kil tura a hmun buatsaih tur Isuan a tirhte hnenah mipa, tuibel hmanga tui chawi an hmuh tur thu a hrilh a, an hmu ta ngei a, a hmun hi an buatsaih ta a ni. Palestina ramah hian mipain tui an chawi ngai lo a, kha pa khan eng ati nge tui a chawi teh tlat? Abrahama hunlai atang tawhin tuichawi hi hmeichhe hnaa ngaih a ni a, Eliazara'n Isaaka nupui tur a zawn khan Rebeki chu tui chawi turin a rawn kal a, Samari hmeichhia pawh tuichhunchhuah bulah tui chawi turin a lo kal a nih kha. Mipa, tuibel pu an hmuh tur thu Isuan a sawi khan zawn chhuah a har dawn lo hle; mipain in chhung sekrek atana hman tur tui an chawi ngai loh avangin. Pathian tihtur min buatsaihsak a, kawng min kawhhmuh hi a fiah lo ruai ngai lo a, a chiang thin tih a tilang âwm e.

Tunge hlauh tur?

Tin, taksa tihluma thlarau tihlum thei lotute chu hlau suh ula; Gehena-a thlarau leh taksa tiboral theitu erawh chu hlau zawk ang che u
Matthaia10:28

Tunlai khawvelah hian ralmuang viau angin lang mah ila, hlauh tur hi kan ngah tial tial a, eizawnna kawngah te, politics thilah te, khawtlangah leh sakhuana huang chhungah hian mihringte hian hlauh kan ngah ta hle. Hman deuh atang khan mi tam takin sakawlh an hlauh avangin chhiarpuiah pawh an inziak lût ve ngam lo a. Sakawlh kha a hlauhawm loh ni lovin, kan hlau emaw, hlau lo emaw, Pathian thuin a lo sawi tawh a nih avangin sakawlh hi a lo lang dawn a. Hlau viau mah ila, a lo lan tur hi a thulh lo vang a, hlau lo viau mah ila a lo lang tho dawn. Sakawlh ngam a, hneh theitu lam kan en a ngai zawk a ni. Hlauhnain min tuamna hrang hrangah eng ber hi nge hlauhawm tih hi kan ngaihtuah chiang lo mai thei a, hlauh loh tur hlauin, hlauh tur tak hi kan hlau lo zawk foin a rinawm.

Bible châng sawizauna
A chunga Bible châng kan tarlanah hian Isuan a zirtirte hlauh tur dik tak leh hlauh loh tur a hrilh a. He thu a sawi hma hian tihduhdahna lo awm tur chungchang a hrilh a. Miin an mantir ang a, an vua ang a, chhungkua an indo ang a, amah Isua hming avangin mi tam takin tihduhdahna an tawk ang, a tawp thlenga tuar peihte erawh chu chhandamin an awm ang, tih thu a zirtir a. Mahse, heng tihduhdahnate hi hlauh tur a ni lo, tihduhdahnate hi chuan tisa chauh an tina thei a, hlauh tur tak tak erawh chu thlarau tihlum thei an ni, tiin hlauh tur dik tak a zirtir a ni.

Hlauh tur dik hriat loh hi a lo hlauhawm a, kawng dik lovah mi a lo hruai kawi thei hle mai. Hlauh tur tak zawk hi hlauvin, hlauh loh tur zawk hi kan lo hlau ang tih a hlauhawm a, hei hi Isua pawhin a zirtirtea a hlauhthawn kha a ni. Chuvang chuan keini pawhin tunge hlauh tur? tih hi kan zir thar fo a tul hle a ni.

A tira kan sawi tak, sakawlh chungchang pawh hi, a hlauhawm a ni. Ringtute tiduhdah a, he khawvela hrehawmna thlentu tur a ni a. Mahse, hlauh tur dik tak a ni em? Sakawlh lo chhuak tur chuan tihduhdahna leh tisa natna leh hrehawmna a rawn thlen thei, mahse Isua chuan heng tihduhdahna leh hun harsa lo thleng tur hi amah zuitute chu hlau lo turin a zirtir a, hei ai chuan hremhmuna kan thlarau paih theitu hlau zawk turin min hrilh.

Kum 1517 khan Martin Luthera chuan Kohhran Siamthatna bul a rawn tan a. Hun a kal zel a, Europe ram boruak chu indonain a bawhbuai ta a. Catholic leh Protestant te an inbei nasa hle a, mi tam tak chu hâl hlum an ni a, thenkhat chu sawisak hlum an ni a, thah pangngai te pawh an awm. Martin Luthera meuh chu a taksa himna tur an ngaihtuahpui a, hmun hrang hrangah a biru kual a. Kohhranin a hnawtchhuak a, amah an veh a, an zawng reng a ni. Chutiang karah chuan Luthera chuan hlauh tur leh hlauh loh tur a hrechiang hle mai - "Pathian thutak an hneh chuang lo'ng, leia mi chakte pung khawmin; Thlarau Thianghlim leh thilpekte, Lalpan min pe, min pui si" a ti mai a ni.

Sakawlh hi tihbaiawmin, ringtute nasa takin tuatrtir thei mah se, sakawlh hian kan thlarau hi Gehenna-ah a paih thei lo. Chatuan hremhmuna kan thlarau luhtir theitu zawk chu Pathian a ni. Hun tawpah Sakawlh hian kan thiam chan leh chan loh kawngah thutlukna siam turin eng thuneihna mah a nei lo a, thuneihna tawp nei a, chatuan hremhmuna kal tur nge kan nih, chatuan nunnaa kal tur zawk tih thutlukna siamtu tur chu Pathian. Chuti a nih si chuan Pathian aia thunei lo zawk, hlauhawm loh zawk Sakawlh hi kan hlau viau a nih chuan hlauh loh tur zawk kan hlau a ni. Miin sakawlha nambara chhinchhiah tlat card emaw, ration card te a lo nei a ni thei e, Pathian a hlauh zawk chuan chungte chu a retrun-in a hmang lo ngam mai dawn a ni.

Taksa tihluma thlarau tihlum thei lote hi kan va hlau sâwt em ve aw! Martin Luthera'n leia mi chakte pungkhawmin Pathian thutak an hneh chuang dawn lo tih a hriatna ang hi kan neih ve loh chuan hlauh loh tur zawk hlau hian kan nun leh kan hun hi kan hmang dawn tihna a nih ber hi. Hotu leh thiltithei kan hlau em em a, an bulah chuan kan ti em em a, an pawi sawi palh kan hlau hle mai. Heng kan hlauh em em te hian kan thlarau an tihlum thei lo a ni tih hi kan ngaihtuah ngai em? Chan that kan duh luatah te, mi hriat hlawh nih kan duh vang te, nawmsakna kan thlakhlelh avangte hian hlauh tur zawk hi hlauvin, hlauh loh tur zawk hi kan hlau thin a nih hi!

Leia mi ropui leh, mi chak leh huaisente hian kan thlarau an tihlum thei lo va, kan zah a, kan tih a, an khabe liam kan chân thinte hian kan taksa bakah engmah tih theih an nei lo. Polycarp-a kha a ropui ngei mai, leia lalte hian thlarau an tihlum thei lo tih a hrechiang hle mai. Isua phatsan tura an tih khan Polycarp-a, putar kum 86 mi chuan, "Kum 86 chhung Krista rawng hi ka lo bawl tawh a, ka chungah tun thlengin thil tha lo a ti ngai lo. Min chhandamtu ka Lal chu engtin nge ka phatsan theih tehlul ang," a ti tlat mai a, an martar ta nghe nghe a ni. Keini chuan leia mi lian leh lalte hi kan hlau lutuk a, kan thlarauin a thih phah thin a nih hi!

Tunge thlarau tihlum thei chu? Tu nge Gehena-a thlarau paih theitu chu? Pathian a ni a, ani chu hlauh zawk tur a ni. Deut. 4:24-ah chuan, "LALPA in Pathian chu kanral hmang mei, thikthuchhe tak Pathian a ni si a," a ti a, hmangaih Pathian a ni si, kan tih lai hian, kanral hmang, thikthuchhe tak Pathian a nihna hi kan ngaihtuah ngai meuh si lo. Polycarp-a te, Martin Luthera te hian tunge Gehenaa thlarau paih theitu an hre chiang a, ani lakah chuan lei lalte hi engmah an ni lo va, ani hlauhawmna lakah chuan anni hlauhawmna chu inkhualtelemna ang mai a ni tih an hre chiang a ni.

Gehena-a thlarau paih theitu hian Setana leh a tirhkohte pawh a ngam a ni tih hria ila. Sakawlh ai chuan Pathian a hlauhawm a, Mizoram Chief Minister thinurna ai chuan a lêt sang tam takin Pathian thinurna a hlauhawm zawk. Hlauh tur zawk kan hriat loh avang hian kan thlarau hi Gehena-ah paihin a la awm dawn a ni tih i hria ang u. Ephesi 5:21-ah chuan Krista tih dekin intulut tawn theuh rawh u, a ti. Chhandama kan awm a, kan thlarau Gehena laka a him theihna chu Pathian tih hi a ni. Chuvang chuan, hlauh tur tak hi hlau ila, tih tur tak hi i tih ang u.

Tuesday, 19 January 2016

Adama nge mihring?

Pathianin mihring a siam hmasak ber hming chu Adama a ni tih Mizo Bible-ah kan hmu a. Hebrai tawng chuan Adam tih hi mihring hming a ni mai lo va, mihring tihna hrim hrim a ni. Chuvang chuan mihring hmasa ber hminga 'Adama' tih hi a dik lo thei ang em?

Mihring hmasa ber hminga Adama hman lar tanna ber nia lang chu King James Version hi a ni. King James Version hi Bible rintlak hmasa ber pawl a nih avangin a influence a nasa hle a. Sap tawng atanga tawng danga Bible lehlin dawn pawhin en berah an hmang fo a ni.

Adam tih hi Hebrai tawnga a awmzia chu mihring, mimal tihna te a ni a. Genesis 2:7 thua leia vaivuta mihring a siam kan hmuhah hian, mihring tih sawi nan 'Adam' tih a hmang a, nunna thaw a thawk luh hnuah mihring chu minung a lo ni ta, tiha mihring sawi nan hian 'Adam' tho a hmang a, chang 8-a Eden huana a dah mihring sawi nan pawh hian 'Adam' tho hman a ni. Gen. 2:19-a 'Adam' tih erawh chu a hnu zelah, tawng danga Bible lehlinah mihring pakhat hming angin hman a ni ta thung. He Adam hi eng ati nge mihring ti lo va, Adama tia lehlin a nih bik daihna chhan hi a mak ang reng hle. Thuthlung Hlui bu dang, Ezekiela bua 'Mihring Fapa' tih lang a, 'Mihring' sawi nan hian Adam tih vek hman a ni bawk.

Sap tawng Bible lehlin dangah, Genesis 2:19, Adama mimal hming anga Mizo Bible-a a lanna hmasa berah hian Adam ti lovin, 'mihring' tiin an hmang vek a (NIV, ESV, NASB, ASV), King James Version-ah chauh mihring ti lovin Adam tiin a hmang.

Mihring suala a tluk hnua Eden huana tlaia Pathian a lên laia thil thleng ziakah, Mizo Bible-ah chuan Adama leh a nupui tiin kan hmu a, mahse Sap tawng Bible - New Living Translation, ESV, NAS leh ASV te chuan 'the man' ti vekin an hmang a, thenkhatah chuan 'they' (Mz. 'an') an hmang a, King James Version-ah chauh Adam tiin a hmang. Hebrai-ah chuan 'Adam' tih tho a ni a, mihring tihna tho a ni.

Mihring tihna kha mimal hming Adama tiin kan hmang ta daih a, hei hi a dik rêng em? Tihsual a ni mai lo'ng maw?

Amaherawhchu Thuthlung Thar lamah hian mimal hming anga hman a ni tho mai a. Rom 5:14-ah chuan Paula'n Adama tih chu mihring hmasa ber hming angin a hmang a. "Adam" ti thovin a hmang a, mihring tih chauh chu nise chuan "Anthropos" tia a hman a rinawm viau. Paula hian hman chhan a nei ngei ang tih a rinawm a, Judate thu inrochun atangin a nih rinawm.

Paula hian Bible a hman ber nia lang chu Hebrai Bible, Greek tawnga an lehlin hmasak ber, Septuagint kha a ni a. Septuagint hi Aigupta rama Alexandria khuaa Juda mithiam rualten BC 300-200 inkara Hebrai Bible, Greek tawnga an lehlin a ni a, Judaten an hmang nasa hle a, a bikin, Palestina rama awm lo Judaten an hmang nasa lehzual. Ptolemy Philadelphus hunlaiin Juda mithiam 70 tena an lehlin a ni a, chuvangin a hmingah Sawmsarih (Septuagint) an ti ta a ni. Septuagint-ah hian tuna Thuthlung Hluia lehkhabu awmsa bakah hian Judithi, Tobitha, Siraka, Solomona thufing, Makkabia I & II, Esdra, Estheri bu belhna, Manessia Tawngtaina, Jeremia Lehkhathawn, Naupang Pathumte Hla, Susani, Bela leh Dragon tihte a awm. (http://www.septuagint.net/). Thuthlung Thar bua Thuthlung Hlui thu lak chhawn reng reng hi Septuagint-a mi deuh vek a ni a. Paula'n mihring hmasa ber sawi nana Adam tih a hman pawh hi Septuagint atanga a lak chhawn niin alang.

Septuagint-ah chuan Genesis 2:7-a leia vaivuta mihring a siama mihring sawi nan hian Anthropos a hmang a, chang 8-ah pawh hian anthropos tho a hmang bawk a, chang 18-ah hian mihring hmasa ber chu mihring ti ringawt tawh lovin Adam tih a hmang ta thung. Mihring suala tluk hnua Pathian huana a lên chungchangah pawh hian 'adam kai e gune', Adam leh hmeichhia tiin a ziak. (http://spindleworks.com/septuagint/Genesis.htm). Juda mithiamte hian eng vangin nge mihring tih, Hebrai tawnga Adam kha a then 'mihring' tia an lehlin a, a then 'Adama' tia mimal hminga an lehlin? Hei hi an lo inzirtir tawhna avang leh, an thu inhlanchhâwn atangin a nih hmel hle.

Amaherawhchu 'Adam' tih mihring ti mai lo a, mimal hming (personal name)-a hman a nih hian Adama kan ngaihdan hi a tidanglam hle a ni. Adama han tih hi chuan mihring fing tak mai, sâr veh vuah, changkang tak angah kan ngaih phah a, hei hian tunlaia thil hlui laihchhuah leh fossil hrang hrang hmuhchhuaha mihring hmasa landan pawm tiharsa khawpin kan ngaihdan a hruai a ni. Eden huanah khan kamrah ringa khawsa, thing rah ei mi an ni a, thingkungah pawh a lawn lung lung thin dawn tihna a ni. Eden huan atanga hnawh chhuah a nih khan, mihring chu thing rah ring mi atangin sapêltuah a tang tih a lan chianna chu Pathianin theipui hnah aiah savun kawrfual a pe a ni. Chuta tang chuan a lo fing leh deuh a, lo neihna châng a hria a, nomadic tribe atangin agriculture-ah a nun a lo innghat ta a, hei hi hnam tin hmasawnna dan thin a ni. Ramhnuaia kamrah ring mai mai atangin sapeltu a lo ni a; ramsa chu pêm kual a, ei tur thatna lam apianga tla chi an ni. Chung ramsate hmuh awlsamna apiangah mihring chu a pêm ve thin a, chuta tang chuan eizawnna changkang zawk a lo hria a, lo neih a lo thiam a, chuta tang chuan khaw ropui leh ram ropui din thei turin a lo insawhnghet ta thin a ni.