Tihdanglam taksa

(He thu ziak tur hian eng lehkhabu mah ka râwn hran lo va, thil hrang hrang ka lo chhiar ve tawh atanga ka thil thlirna ve mai a ni!)

Paula chuan 'He tawih thei hian tawih thei lo asin ang a...' titein a sawi duah mai a. Eng nge tawih thei lo taksa chu ni ang? Engtin nge a awm ang? he zawhna hi chu a har deuh a, heti zawng hian zâwt ve ta thung ila - Tawih thei taksa hi eng nge? Tihdanglam loh taksa hi eng nge, engtin nge a awm?

Kan taksa awmzia chu kan hre viau ang a, doctor-te phei chuan an hre lehzual ngei ang. Zâng ruh chhunga nerve kal thlain, pancrease lam a kai phei dan te, dendrite nerve nihphungte hi keia lo hrilhfiah ve chiam tur a ni lo va, a thiam pawh ka thiam hek lo. Tawih thei taksa nihphung ka sawi thiam ve dan thung chu 3 dimension a ni, tih hi a ni.

3Dimension

3 dimension chu movie leh games-ah te chuan kan hre lar viau, mathematically chuan lxbxh (length x breadth x height) tiin kan sawi fiah thei ang. lxbxh hmang hian mihring taksa chu kan hrilhfiah thei a, a pianzia te, a len zâwngte kan sawi thei a ni. Thil che lai sawifiah nan lxbxh bakah hian Space-time dimension an hmang thin bawk. 3D taksa nei, thil che chu a nihphung sawifiah tur chu hun eng emaw chhunga a awm hmun a hran dan kha sawifiah tel a ngai thin. Heti hi kan taksa a ni a, kan mit pawh hi 3D hmu theia siam a ni a, kan thluak pawh hi 3D chin hrethiam thei tura siam a ni. Chumi awmzia chu mihring hi a lo ropui lo hle a, a hriatthiam chin a tlêm a, a hmuhfiah theih chin pawh a zîm hle a ni.

Thi thei taksa khawvel chu 3D khawvel a ni a, tawih thei taksain a hriat chin chu 3D khawvel chiah a ni. Hun pawh then thum - hmân, tûn leh nakkin te an awm.

Eng Diamension nge?

Tihdanglam taksa chu eng nge ni ta ang? Dimension ropui zawk a ni, kan ti thei ang. Chu dimensional world-ah chuan time (hun) hian awmzia a nei tawh lo va, keini 3D te tan chuan 'Tûn' a ni reng mai dawn a ni. A chhan chu he dimension hi kan hriatthiam loh vang a ni. 100D chu keini mihring, 3D te tan hian hriatthiam ngaihna a awm tawh lo. Mathematics hmangin 10D hi hrilhfiah han tum teh, a formula tur hi ngaihtuah chhuah a har teh a nia! Mahse, tihdanglam taksa chu 100 dimension a ni ang, ka tihna erawh a ni chuang lo.

2D-ah chuan lxb emaw, lxh emaw, bxh emaw chauh a ni dawn tihna a ni a. lxb angah hian lo ngai ta ila, 2D in chhungah chuan mihring, 3D taksa nei chuan, a kawngkhara lût tlang kher lovin, kan duhna lai takah kan awm thei dawn a ni. A hnuaia lem hi en ila:

2D mihring tan chuan a kawngkhar lut tlang kher lo chuan a in chhunga thuthlengah a thu thei lo. 2D in chuan Height a tlakchham avangin 3D mihringte tan chuan dâltu a awm miah lo! Kawngkhar kal tlang kher lovin a kutin thuthleng a khawih mai thei a ni. Isua kha a thawhleh hnu khan, pindan inkharkhip tlata awm a zirtirte hnenah, kawngkhar emaw, tukverh emaw kaltlang miah lovin a lut thei; eng nge a chhan? dimension ropui zawka a awm tawh vang a ni. Ani dimension being dang thei tur kha 3D khawvelah hian a awm lo: lxbxhx?x?x?x? emaw vel lo ni ta se, kei ni tana eng anga pindan phui thaah pawh ani kha chu a lût zung zung thei dawn a ni.

Khawiah nge Vanram?

Thlaa Neil Amstrong-a te an inkah kai khan Vanram an hmu miah lo va, thlarau khawvel pawh a lo awm chuang lo! Boruak zau zawk an hmu mai a ni. A chhan chu thlarau khawvel te, vanram te nen hian dimension-a then hran kan ni. Pathian tan chuan engkim hi langtlang leh inhawng sa a ni, a chhan chu Pathian chu Infinite Dimensional Being a nih vang a ni a, keini Finite Dimensional Being tan hi chuan hriatthiam ngaihna a awm lo. Vanram hi Sirius B piah lamah emaw, Andromeda Galaxy velah a awm daih lo, kan bul maiah hian a awm a, dimension a hran avangin kan hmu lovin, kan bulah a awm tih kan hre lo mai zawk niin alang. Mi hausa leh Lazara tehkhin thua Abrahama âng chhung leh hrehmun daidangtu kha 'leikak' ni mai lovin, 'dimensional difference' a nih zawk ka ring.

Tichuan tihdanglam taksa, tawih theia phum, tawih thei lova kaihthawh tur chu 3D atanga dimension ropui zawka inthlakthlengna a ni, kan ti thei ang. 2000D emaw vel lo ni ta se, mihring taksa 3D chu ho a va ti dawn em! An tih theih chin a intam hleih dan tur chu a nasa ngawt ang. 4D pawh a nihphung zawng zawng hrethiam pha lo tan chuan 100D ringawt pawh hi 'ropui rapthlak' a ni ngei ang.

Old Firm Derby (Celtic leh Rangers)

A bul tanna

Mizoram Synod leh Baptist Church of Mizoram te hian football club din ve ve ta se, Mizote hi nasa takin min thenin, min inhuattir thei ngei ang a, kohhran erawhin Mizote nunah hmun pawimawh lehzual a luah ngei ang. Hetiang hi Scotland-ah chuan thil thar a ni lo va, kum za chuang an lo kalpui tawh a, thisen tam tak a luang tawh bawk.

Manchester United leh Manchester City inelzia te. Liverpool leh Everton derby ropuizia leh boruak sânziate kan sawi thin a. Mahse, Rangers leh Celtic inkara boruakte nena khaikhin chuan, heng club-te inelna hi chu naupang chhe infiamna ang chauh a ni tlat!

Khing English club kan tarlan takte khi chu khaw khata club inel tak an ni ve mai a, mahse Rangers leh Celtic hi chu Glasgow khawpuia club, inel ve tak mai an ni ringawt lo va, an inkarah hian hnam, sakhua leh politics a awm a. Club pahnih football khel a ni satliah lo va, kohhran pahnih, party pahnih inbei a ni tel tlat! He boruak hi football tuipuite chuan ngaihnawm an ti hle lawi a, Scottish Football an ngaihhlut phah thin.

Irish vrs Scottish

Old Firm derby tia an sawi thin, Celtic leh Rangers football match hi khawvela derby upa berte zinga mi a ni a, 1888 kum atang khan sawi tan theih a ni. Hemi kum atang hian heng club inhal tak pahnihte hi vawi 370 chuang an inkhel tawh a. Ibrox Stadium-ah a ni emaw, Celtic Park-ah a ni emaw, boruak tan loh lai a awm ngai lo. Scottish Cup emaw, Scottish League Cup emaw a nih chuan Hampden Park-ah khelh a ni thin.

Rangers leh Celtic boruak phêna thil inphum chu Protestant leh Catholic, Loyalist leh Republican te a ni. Celtic hi Scotland-a Irish pêm lûtte chuan tan ngei ngei turah an ngai a, heng Irish pêm lûtte hian 1888 kum khan he club hi an din a, Rangers hi 1873 kuma din a ni. Rangers hi Scot mi tan chuan tan loh theih loh a ni bawk. Irish-ho hi sakhuana lamah chuan Roman Catholic an ni a, politics lamah chuan British awp hnuaia awm duh lo an ni a, tun thlengin Northern Ireland-ah khuan hel pawl chak tak mai, IRA an nei. Rangers tantute hi Protestant background an ni tlangpui a, (Scotland hi Presbyterian Kohhran din hmasak berna ram, Presbyterian Kohhran inkaihhruaina John Knox-an a siam a taka kalpuitu hmasa ber ram a ni), politics lamah chuan England lal chhungkaw lamtang an ni.

Catholic vrs Protestant

Tunhma, 1989 hma lam kha chuan Rangers hian Catholic mi player an lalût ngai lo va, Catholic player an neih hmasak ber chu Mo Johnston a ni. Ani hian a hmain Celtic-ah pawh a lo khel tawh bawk. Hemi hnu atang hi chuan Ibrox Stadium-ah hian Catholic player hmuh tur an awm ta fo. Mo Johnston-a'n Rangers-ah contract a sign hian Rangers fans ruhkawlte thin a rim hle a, phatsanna ang hiala ngaiin an lungawi lo thâwm pawh a ring hle. Celtic lam hi hetiang lamah chuan an thiangzau deuh hlek a, an player zingah hian Protestant mi an awm nual thin a, Henrik Larsson te pawh kha Protestant a ni a, mahse Celtic player tha ber pawl a ni thin.

An inkar boruak hi a sân hma êm avangin buaina chhuah chhan leh an duh loh thilte pawh ho tê nia lang a ni thin. Paul Gascoigne kha, Rangers-a a khelh laiin, 1995 kum khan, Celtic-ho hmuh leh hriat laiin a lunglengin phenglâwng a tum ngawt mai a, Celtic-ho chuan an pai dai thei meuh lo. Anni ngaih chuan phenglawng chu Loyalist-ho nena inkaihhnawihna nei a ni a, Scottish FA pawhin he thilin pawi a khawih dan an hria a, chuvang chuan Paul Gascoigne pawh an thunun ta rêng a ni. 1999 kum khan Rangers vice chairman Donald Findlay chu Rangers Club hla Billy Boy a sa lai TV-ah tihlan a ni a, Celtic fans leh Celtic thuneituten an nawr nasat em avangin a nihna atang hian a inhnûkdawk hial a, £3,500 thuneituten an chawitir bawk. Billy Boy hla hi tunah chuan UEFA lam chuan an sak an phalsak tawh meuh lo.

God Bless the Queen

Celtic khelmual, Celtic Park-a British hnam hla 'God Bless the Queen' sak chu pawi nasa tak sawina a ni tlat! Anni tan chuan British awp hnuaia an awm lantirtu leh British-ho, English-ho inlulinna lantirtu a ni a, hla duhawm ni lovin hla huatthlala a ni thung. British thliarkara Catholicism tihniama Protestanism chawisangtu fakna hla hi an tan chuan hla ngainatawm leh mawi a chang thei lo hrim hrim! Hlimpui kum pawh thleng an sak hmasak loh berte zinga mi a ni ngei ang. 2002 kum khan Celtic Park-ah hian Celtic leh Livingston te an inkhel dawn a. Inkhelh hma hian Livingston hian God Bless the Queen hla ngei mai hi an sa a, hetih chhung hian minute khat chhung ngawi renga awm tur a ni a. Mahse, Celtic, Roman Catholic ni bawk, Republican ni bawkte chuan an ngai thei thak lo, bengchheng an siam a, referee Willie Young chuan buaina a inmûng tih a hriat chuan ngawi renga awm hun chhung chu minute chanveah a titlêm ta ringawt a ni.

Willie Young hi Protestant a ni a, Rangers tan tawptu a ni. Arsenal-ah player lo ni tawh a ni a, Scot mi dik tak a ni. Rangers leh Celtic inkhelh tum chuan referee-a hman chi a ni chiah lo. Ibrox hmuna Rangers leh Celtic an inkhelh tumin a tan lam a tilang lutuk a, Celtic fans ten Ibrox an chhuahsan nguah nguah a, hrem a tawrh phah nghe nghe a. Celtic player pakhat a hnawhchhuah kha chu a ngawihbopui mai theih a, mahse referee kawr hnuaia Rangers jersey a lo ha kher erawh kha chu a inhmeh thlep thlawp hle mai titu an tam lo khawp mai.

Phenglâwng tum anga awm hi Celtic fans-te tan chuan huatthla la tak mai a ni. July, 2008 khan Nothern Ireland striker, David Healy, Fulham striker thin kha, Fulham leh Celtic ten London-a friendly match an khelh tumin Celtic fans-te hmaah phenglawng tum angin a kut a dah a, hei hian Celtic lam thin a tiur hle a, an complain hial a ni. Ireland pangngai hi Roman Catholic ram a ni a, Nothern Ireland hi Protestant an ni a, chuvanga United Kingdom-a tel an ni. Nothern Ireland-a Roman Catholic-te chuan Britain atanga inlakhran tumin an la bei reng.

Ibrox-ah

Rangers stadium Ibrox hi Roman Catholic tan chuan nun dan leh thil kalphung hre miah lova luh ve ngawt chi a ni meuh lo. 1999 kum khan, Mark Viduka Celtic-a a khelh laiin, Rangers khelmualah an zin chhuak a, hemi tum hian Roman Catholic-hovin an tih thin Kraws chhinchhiahna hmangin mal a insâwm a, Rangers te pawi sawina a tlin avangin referee chuan warning a pe hmak. 1996 kuma Ibrox stadium-a Rangers leh Glasgow-a club pakhat Patrick Thistle an inkhelh tumin Rod McDonald chuan Kraws chhinchhiahna hi a siam a, referee chuan Yellow Card a pek phah tawh bawk! Celtic keeper lar Artur Boruc hi Poland mi a ni a, Roman Catholic ruh tak a ni. 2008 April-a Rangers leh Celtic an inkhelhin jersey hnuaia a t-shirt hak 'God Bless the Pope' tih ziakna a pholang chuan Rangers fans thin a tirim hle a, Scottish Football Association pawhin a chêt dan hi an ngaihtuah nghal vat a. Scotland-a Roman Catholic Kohhran te inrawlhna leh ngenna avangin a chungah hremna lekkawh a ni ta lo hlauh a ni. Mahse, tinawn leh tawh lo tura hriattirna pek a ni thung.

Rangers leh Celtic inkhelah hian chhiatna lian tham tam tak a lo chhuak tawh a, mi tam takin nunna an chân phah tawh bawk. 1980 kuma Scottish Cup final khelh zawh hnua intihbuaina thleng te kha khawvelin a la hre reng a ni. Heng club inhal tak tak pahnih inkhelh tum hian Glasgow damdawi-inte chuan nidang aiin damlo/inhliam a lêt 9 kua ngawtin an ngah a, inkhelh a awm apiangin mi 150 ten man tâwk ziah ang an ni bawk.

Tunhnai

Kum 2000 hnulamah hian a ziaawm deuh tawh nain dam thlep thlawp erawh a la ni lo thung. Nikum April thla khan Billy Boy hla an sak avangin Rangers chu UEFA-in a hrem a, an home-a an khelh tur tum hnih chu khelh a khapsak a ni. Sakhuanain Europe-ah hmun a chang tlem tulh tulh a, chutiang bawk chuan Celtic leh Rangers inkar pawh hian ziaawm lam a pan hret hret a. UEFA hmalakna avangin boruak pawh a ziaawm sâwt tawh. Scot leh Irish mipui inhuatna pawhin ziaawm lam a pan hret hret a, Scotland sorkar pawhin hma nasa takin a la mek.

June 2011 khan Scottish sorkar chuan football stadium-ah mai ni lo, mipui punkhawmna hmun hrim hrimah football kaihhnawiha inhmuhsitna leh inchungtlakna a thlen loh nan dan thar a duang a. He dan bawhchhia chu kum 5 thleng lung-in tântir theih an ni. He dan hian hian a huam zau hle a, football chhehvela sakhua inhmusit zawng leh, sakhuana thila inhuatna chawktho thei thil a khap tel vek bawk.

Âtchilh neihna khawvelah hian thenkhatin football an âtchilh a, thenkhatin Justin Bieber emaw, eng emaw tal an âtchilh thin. Keini hian eng nge kan âtchilh ve dawn le? Tu fans nge kan nih a, hringnun khawvela inkhelhna mualah hian tu lamah nge kan tan ve le? Mi tam takin an âtchilh zâwngte tan chuan na tawrh an hreh lo va, thih an hlau lo; nang Isua tan hian eng nge i huam ve le?

(Kristian Thalai June Issue-ah chhuah a ni tawh)

Illuminati leh a behbawm

80s leh 90s chhoa rock band leh music khan sawisel a hlawh hle a. Setanic music, kan ti a, thusawinaah te kan sawisel nasa hle thin. Tunlai music-ah rock music-in hmun a chang lian ta vak lo va, mahse hip-hop, R&B leh rap music ten hmun an chang lian hle. Heng music hla thute hi sex leh tharum thawhna lam a ni deuh ber a, mahse, hemi piaha thil awm hi ngaihtuahna châng hre lo tam tak kan awm, chung chu thenkhat tarlan kan tum.

Hla thu tam takah thil ho deuh anga lang a awm viau mai; chu chu Rainman hi a ni. A tawng bul atanga chhui a ngai hran lo. Rain chu naupang pawhin ruah a ni tih an hre thei ang, chutiang bawkin Man pawh. Rain Man chu Ruah Mi tihna mai a ni; chu chuan eng nge awmze ril a neih le? Rain tih hrim hrim hi a hmanna hrang hrang a awm a, thil tam tham tak pe, vûr tihna te pawh a ni bawk. Tunlai zaithiam leh hla phuahtuten an hmanna pawh hi chutiang deuh bawk chu a ni.

Rain Man tih lanna hla hrang hrang atanga kan hmuh chu Rain Man chu malsawmna, sum leh paia mihringte vûr a, larna leh mipat hmeichhiatnaa an mamawh petu angin a ni. Eminem-an 'My name is Rain Man' a tih leh, Ozzy Osbourne-an, 'My name is Lucifer' a tih chu thil thuhmun a ni. Setana chu he khawvel thim chunga roreltu a ni a, hausakna, larna te mihring chungah, ama hnena inpete hnenah a pe thin a, chuvangin music industry chuan a hmingah Rain Man tiin an sawi ta a ni. Zaithiam tam tak chuan an thlarau hi ramhuai hnena an hlan thu an sawi thin a ni (eg. Kanye West, Katy Pery, Jay-Z, Eminem ldt).

Illuminati

Hla thenkhat kan tarlanah khian 'Illuminati' tih kan hmu ang. 'Angels and Demons' film-ah khan Illuminati kan hmu bawk. Illuminati hi mi tam tak chuan film leh thil danga hman atana an phuahchawp niin an ngai a. Mahse, thawnthu satliah a ni lo, nise, Tupac te hian a sa a sa lo ang.

Illuminati sawi chiang tur chuan kum zabi 18-na laiah kir a ngai. Bavaria (tunlaia Germany ram) ah Adam Weishaupt a awm thin a. Weishaupt hian kum 1776 May 1 khan Illuminati pawl hi a din a. He pawlah hian hetih hunlaia vantlangin an pawm leh ngaih ang pawm lotu, (inti) ril tak tak an tel a ni. Kum 1777-a Karl Theodor-a Bavaria lal a nih khan Illuminati hi a duh lo nghal hle a. Kum 1784 khan Illuminati pawh chu tihtawp thu a pe ta a ni. A kum leh, 1785 March 2 chuan Bavaria-a Illuminati tawh phawt chu man theihna thupek a chhuak a, Weishaupt chu a tlanchia a, a lehkha pawimawh tak tak erawh man a ni thung.

Hemi hnu hian Illuminati hi a rûkin a la ding zel a, French Revolution-ah pawh khan a meizanghlaptu berah an la tang niin an sawi thin. Hemi hnu hian a zuihral ta niin mi thenkhatin an ngai a. Thuziak mi Mark Dice te, David Icke leh mi dang dangte chuan a rûkin a la ding chho zel niin an ngai thung. Illuminati zirchiangtu Wes Penre chuan tun thlengin a rûkin a la ding niin a sawi a, thil ti thei tak niin a ngai bawk.

Wes Penre-a paper 'The Secret Order of the Illuminati: A Brief History of the Shadow Government' pawh a ngaihnawm hle. Hetah hian, thim thuneihna nen tangrualin, a rûkin khawvel ei leh bâr, politics leh sum leh pai an thunun a, media pawh hi an hmanraw tangkai ber a ni. An duhzawng apiang an ti lar a, an duh loh zawng chu nasa takin an tihmingchhe bawk. Penre hian Illuminati-a thuneitu ber (bloodline) chu tunlai khawvela chhungkaw hausa ber ber 13 an niin a sawi a, an tum ber chu khawvel pum rorelna pakhat hnuaia dah (one world order) a, an duh duha chin leh kual a ni. He an thil tum hi a rûkin mipuite thinlunga tuh turin zaithiam rual an hmang a. Heng zaithiamte hian an hla thu hmangin mipui rilru hi an hneh mek a ni.

Umbrella

Rihanna leh zaithiam tam tak hla thuah, 'Umbrella..ella..eh..eh' tih ang chi hmuh tur a tam hle. Umbrella sawifiahna hrang hrang zinga pakhat chu 'thil, min pui a, min vengtu' a ni. Umbrella chu Latin tawng Umbra atanga rawn kal a ni a, a awmzia chu 'hlim' (shadow) tihna a ni. Latin-a a awmze dangah chuan 'Phûng' emaw 'Thlarau/ramhuai' emaw tihna a ni bawk. Occult lehkhabu pakhat Necromonicon-ah chuan Umbra chu thlarau pakhat, sum leh paia malsawmna thlentu leh, mipat hmeichhiatnaa duhthusam thlentirtu angin tarlan a ni. Umbra chu ramhuai, Setana anga tihlan a ni.

Chhuah a harsa em?

A harsa a nih hmel, zaithiam ho hian an hla thuah an tilang ve leh tlat zel. Tupac-a Killuminati te pawh kha a ni a, mahse a chhuahsan ta chiah nge chiah lo kan hre hman lo, kahhlum a ni ta mai si a. Eminem hian Illuminati hi chhuahsan a tum nasa niin an sawi a,

Lil Wayne chu ralthuam a kawl avangin hun rei tak chhung jail-ah a tân phah. Hei hi Illuminati chhuahsan a tum vang niin an sawi a. Illuminati te hian an hmanruaa an lo hman hrep tawh, anmahni phatsan tumte chu hmingchhiatna nasa tak nen an thehberh zui thin a ni. T.I. pawh jail a tan chhan berah khan Illuminati hi niin an sawi. An hriat miah lovin an in chhungah ralthuam emaw, ruihhlo emaw an lo dah a. Hetiang thil an kawl a ni tih an hriat hauh loh kha police-te tuemaw ten an lo hrilh a (Illuminati tho), an man a, an hming a chhia a, an record hralh a tlahniam a. An lo awm nuamsa laklawh a, sum leh paiah harsatna an tawk thuai a, chuta an din chhuah leh theih nan chuan Illuiminati hi an belh a ngai leh thin a ni, an ti.

Rapper DMX chu a inah ruihhlo an mansak a. Ani chuan a neih loh thu leh a ta a nih loh thu a hrilh a. Mahse an man miau mai sia, amah pawhin mak a ti. Zaithiam a nih avangin hmingchhiat a duh bik lo; Police hnenah chanchinbu mi leh pawn lam mi an hrilh em tih a hnua a zawhin an hrilh loh thu an sawi a, chuti chung chuan chanchinbu mi thahnem tak police station-ah an lo awm hman tlat! Illuminati te thiltih leh phiarrukna niin a ngai hmiah a, an pawl a chhuahsan loh nana an hlin beh tumna hmanrua niin a ngai. Whitney Houston pawh kha Illuminati tena an thah niin an sawi!

Amaherawhchu...

Thil tam tak, Illuminati chungchang an sawi a, mahse heng zawng zawng hi zaa za a dik vek tihna a ni lo. Khawthlangho khu keini aiin thuphuahchawp an uar a, an thiam a, an media pawhin an chhuah huai bawk. Thil tak tak tam tak a awm ang tih chu phatrual a ni lo, mahse thu belhchian dawl lo tam tak a awm ve tho ang tih hriat tur. Illuminati din kum hi 1776 a ni. Dollar-ah pyramid a awm a, chumi hnuaiah chuan Latin ziak danin MDCCLXXIV tih a inziak a, 1776 tihna a ni. America hi Illuminati te din leh thuneihna, an pawisaah pawh a lang a ni tih tan chhanah an hmang thin. Mahse, MDCCLXXIV hi British sorkar atanga inla hrang tura US-in Declaration of Independence an chhuah kum a ni. Amaherawhchu, US hruaitu hluite leh thil tam tak hi chu Freemasonry nen inzawmna a nei tih erawh phatrual a ni lo ang.

Thil pawimawh tak mai chu miin an sawi zawng zanwg hi thudik a ni vek lo, tih hi a ni. Thenkhat chuan intihlar nan leh, an thuziak miin ngaihven se, an duh avangin tai an nei sa nghal rân a ni. Uchuak takin eng emaw lai an sawi uar vak thin bawk. Rock leh heavy metal band inla rapthlak leh inti setanic tam tak hi an setanic tak tak vang a ni lem lo, audience an hîp nan mai a ni; setanic tak tak erawh an awm tho. Thenkhat chuan an music an hralh that theih nan existing society dodal rânin hla an siam a, an perform thin. Stage-a an landan leh an incheina avangin misual an ni tihna erawh a ni kher lo. A market lam an ngaih pawimawh avangin an hralh theihna tur a nih chuan maksak tak taka awm an hreh lo.

Thudik tluantling lo tam tak a awm a, pawm tur leh pawm loh tur hriat hran a har lai tak hian 'Nang erawh chu engkimah fimkhur la'....tih kha hre reng ila, 'Kei hi kawng leh thutak leh nunna chu ka ni' titu bak hi thutak he khawvelah hian a awm lo tih hriain, thutak chu i pawm ang u.

(Kristian Thalai July 2011 Issue-a mi leh Zalen-a mi kaihkawp a ni)